PROGRAMU YA UFADHILI WA MASOMO YA GOMBE KWA UTAFITI WA WANYAMA WA JAMII YA NYANI

Kategoria:

 

Kuhusu Ufadhili:

Mpango wa Ufadhili wa Masomo wa Gombe unatoa msaada kwa wanafunzi wa shahada ya uzamili na uzamivu wanaofanya utafiti wa uwandani kuhusu nyani, sokwe, na wanyama wengine wa jamii ya nyani ndani ya maeneo ya uhifadhi ya Gombe. Mpango huu unalenga kuimarisha sayansi ya uhifadhi kwa kuwaendeleza watafiti chipukizi waliojitolea katika uhifadhi wa wanyamapori na utunzaji wa mazingira unaoshirikisha jamii.

 

Ufadhili huu unatoa msaada wa kifedha kwa wanafunzi watatu (3) kwa kipindi cha miezi 1–6 ya utafiti wa uwandani, na unalenga kuongeza maarifa ya kisayansi pamoja na mchango katika uhifadhi.

Vigezo vya Kustahili

  • Kuwa Mtanzania aliyesajiliwa katika programu ya shahada ya uzamili au uzamivu katika fani ya utafiti wa wanyamapori, biolojia ya uhifadhi, zuolojia, elimu ya nyani (primatolojia), sayansi ya mazingira, au fani inayohusiana.
  • Kufanya utafiti ndani ya maeneo ya uhifadhi ya Gombe.
  • Kuonyesha dhamira ya kuhifadhi wanyamapori na kuendeleza jamii.
  • Kuonyesha uhitaji wa msaada wa kifedha kwa ajili ya utafiti wa uwandani.
  • Kuwasilisha uthibitisho wa usajili au udahili katika chuo kikuu kinachotambuliwa na TCU.
  • Kuwa tayari kufuatiliwa na kutathminiwa katika kipindi chote cha ufadhili.
  • Kuwasilisha ripoti ya mwisho ya utafiti na kuwa tayari kushirikiana na Taasisi ya Jane Goodall pale inapohitajika.
  • Ufadhili huu uko wazi kwa waombaji wa jinsia zote.

 

Gharama Zinazogharamiwa na Ufadhili

  • Ufadhili unagharamia gharama zilizoidhinishwa za utafiti wa uwandani, ikiwa ni pamoja na vifaa vya uwandani na vifaa vya kuandikia, vifaa vitumikavyo vya maabara, malazi wakati wa kazi za uwandani, msaada wa wasaidizi wa utafiti wa uwandani, chakula wakati wa shughuli za uwandani, na usafiri unaohusiana na utafiti wa uwandani.

 

Kumbuka: Ufadhili unagharamia gharama za utafiti wa uwandani pekee, na haugharamii ada za masomo wala gharama za kitaaluma za muda mrefu.

 

Mahitaji ya Maombi

Waombaji wanatakiwa kuwasilisha:

  • Barua ya maombi inayoeleza kwa nini wanastahili kupata ufadhili huu
  • Wasifu (CV) uliosasishwa
  • Andiko la utafiti/mpango kazi
  • Barua mbili za mapendekezo
  • Uthibitisho wa usajili/udahili
  • Maelezo ya bajeti ya msaada wa uwandani unaoombwa

 

Matokeo Yanayotarajiwa

Wanufaika wa ufadhili wanatarajiwa kuandaa machapisho ya kitaaluma yatokanayo na utafiti wao, kama vile:

  • Makala katika majarida yaliyopitiwa na wataalamu
  • Makala za mikutano ya kitaaluma
  • Sura za vitabu
  • Tasnifu za uzamili au uzamivu zilizochapishwa
  • Muhtasari wa kitaalamu, miongozo ya uwandani, au machapisho mengine ya kisayansi yanayotambulika

Jinsi ya Kuomba

Wasilisha maombi yako kwa barua pepe kwenda JGITZScholarship@janegoodall.or.tz.

 

Tarehe ya Mwisho ya Kuwasilisha Maombi: 11 Agosti 2026.

Imetolewa na:

Mkurugenzi wa Programu

Kituo cha Utafiti cha Gombe Stream

Taasisi ya Jane Goodall Tanzania

S.L.P. 1182

Kigoma, Tanzania

Nyuma